Laborantja 28-vjeçare vdes nga murtaja pas një incidenti në laborator

 

Një teknike e re laboratorike 28-vjeçare nga Rusia ka humbur jetën nga murtaja, disa ditë pasi dyshohet se në një institut shkencor në Irkutsk është thyer një epruvetë që përmbante bakterin shkaktar të murtajës pulmonare.

Pas dyshimeve për një incident laboratorik, rreth 200 persona që mund të kenë pasur kontakt me gruan janë izoluar ose janë vendosur nën mbikëqyrje mjekësore.

Sipas raportimeve të mediave, incidenti ka ndodhur më 25 shtator, në Institutin Shtetëror për Luftën kundër Murtajës në Irkutsk, në Siberinë lindore. Gruaja, e identifikuar si Darja S., punonte si teknike laboratorike. Për arsye që ende nuk janë bërë të ditura, është thyer një epruvetë që dyshohet se përmbante shkaktarin e murtajës pulmonare.

Instituti merret me studimin e patogjenëve të rrezikshëm, analizimin e mostrave dhe zhvillimin e metodave diagnostikuese. Gjithashtu, ai monitoron vatrat natyrore të sëmundjeve infektive në Siberi dhe Lindjen e Largët, si dhe ruan shtame bakteriale.

Guvernatori konfirmoi se gruaja vdiq nga murtaja

Nuk dihet se kur kanë nisur simptomat e para. Darja u shtrua më 29 shtator në një spital në Shelekhov, rreth 20 kilometra larg Irkutskut.

Sipas raportimeve, gjendja e saj u përkeqësua dhe ajo u vendos në respirator. Natën mes 1 dhe 2 tetorit, 28-vjeçarja ndërroi jetë.

Më pas, guvernatori i republikës fqinje të Burjatias konfirmoi se shkak i vdekjes ishte murtaja.

Reparti i spitalit u vendos në karantinë

Pas rastit u aktivizuan menjëherë masat mbrojtëse. Reparti ku ishte trajtuar gruaja u vendos në karantinë, ndërsa pranimi dhe dalja e pacientëve u pezullua përkohësisht në disa reparte të tjera.

Rreth 200 persona që mund të kenë qenë në kontakt me të janë izoluar ose janë transferuar në institucione të tjera shëndetësore për monitorim. Sipas guvernatorit të rajonit të Irkutskut, deri tani asnjëri prej tyre nuk ka shfaqur simptoma.

Punonjësit e institutit, gjatë kryerjes së procedurave me rrezik të lartë, përdorin veshje të posaçme mbrojtëse.

Ishte e trajnuar për punën me patogjenë të rrezikshëm

Darja S. ishte e trajnuar për punë me mikroorganizma të rrezikshëm. Dy vite më parë, ajo kishte përfunduar me rezultate të shkëlqyera një trajnim shtesë për diagnostikimin laboratorik klinik në Universitetin e Mjekësisë në Irkutsk.

Sipas raportimeve, ajo punonte në Institutin për Luftën kundër Murtajës të paktën që nga viti 2022.

Megjithatë, epidemiologu Mihail Favorov ka shprehur dyshime lidhur me versionin e ngjarjes. Sipas tij, punonjësit e institutit përdorin veshje mbrojtëse gjatë punës me patogjenë të rrezikshëm, ndaj ai e konsideron më pak të mundshme që infektimi të ketë ndodhur në vendin e punës.

Vetë instituti, deri tani, nuk ka bërë një deklaratë publike lidhur me vdekjen e punonjëses së tij apo me incidentin laboratorik.