Një përleshje masive në rrugën Zelenih beretki, në qendër të Sarajevës, nisi pasi një person, sipas informacioneve të policisë, sulmoi fizikisht një kamarier.
Ministria e Punëve të Brendshme të Kantonit të Sarajevës njoftoi se policia mori një denoncim të enjten në orën 16:42, për sulmin ndaj punonjësit të një lokali.
Kur policët mbërritën në vendngjarje, gjetën vetëm kamarierin, i cili u dërgua për kontroll mjekësor. U konstatua se ai kishte pësuar lëndime të lehta trupore.
Policia kreu këqyrjen e vendit të ngjarjes dhe mori dëshmi nga disa persona. Nga veprimet hetimore u konstatua se në përleshje ishin përfshirë dy persona në njërën anë dhe katër në anën tjetër.
Hetimi është në vazhdim, ndërsa policia po punon për identifikimin e të gjithë pjesëmarrësve dhe zbardhjen e rrethanave që i paraprinë përleshjes. Pas mbledhjes së të gjitha informacioneve, prokuroria kompetente do të vendosë për kualifikimin juridik të ngjarjes.
Më herët në rrjetet sociale ishte publikuar edhe një video e incidentit, ku shihet përleshja mes disa personave, gjatë së cilës janë përdorur karrige bari dhe dërrasa.
Në fund të videos, ndërsa disa prej personave largohen nga vendi i ngjarjes, njëri prej tyre dëgjohet duke kërcënuar se do të kthehet pas dhjetë minutash.
Sipas informacioneve të deritanishme, policia mbërriti menjëherë në vendngjarje, por personi që kërcënoi se do të kthehej nuk u shfaq më.
Post a Comment
0Comments