Cigaret e kontrabanduara nga Mali i Zi kanë kaluar për vite me radhë në territorin e Bosnjë e Hercegovinës përmes rrugëve malore mes Pluzhinës dhe Gackos, ndërsa më pas përfundonin në tregun e zi, përfshirë rrugët e Sarajevës.
Sipas dokumenteve të hetimeve të siguruara nga BIRN, grupet e dyshuara për kontrabandë monitoronin lëvizjet e policisë kufitare dhe shfrytëzonin momentet kur patrullat ndërronin turnet për ta kaluar mallin pa u vënë re.
Në pjesën e hetimit që zhvillohet në Mal të Zi, nëntë persona, mes tyre edhe katër zyrtarë policorë, po përballen me akuza për kontrabandë cigaresh gjatë periudhës 2019–2021. Sipas pretendimeve të prokurorisë, dëmi i shkaktuar shtetit nga kjo veprimtari arrin në rreth 17.5 milionë euro.
Rrugët malore shfrytëzoheshin për të shmangur kontrollet
Sipas dosjeve hetimore në Bosnjë e Hercegovinë, policia dyshon se Nebojsha Miletic dhe Mlladen Zirojeviq, nga zona e Gackos, kishin krijuar një rrjet për pranimin dhe shpërndarjen e cigareve të kontrabanduara nga Mali i Zi.
Terreni malor dhe rrugët e pakalueshme për shumicën e automjeteve dyshohet se u mundësonin kontrabandistëve të shmangnin pikat zyrtare kufitare. Një prej rrugëve që përdorej lidh fshatin Lipnik në zonën e Gackos me Ravnën në Pluzhinë, ndërsa distanca mes tyre është vetëm rreth 10 kilometra.
Për banorët e zakonshëm, kalimi mes këtyre zonave kërkon një rrugëtim shumë më të gjatë dhe kalimin përmes pikës kufitare Deleusha–Vraçenoviqi.
Një burim i sektorit të sigurisë në Bosnjë e Hercegovinë e ka përshkruar rrugën malore si një itinerar që përdoret kryesisht për kontrabandë.
Ndërrimi i turneve, momenti që shfrytëzohej nga kontrabandistët
Sipas dokumenteve, anëtarë të tjerë të grupit monitoronin lëvizjet e policisë, ndërsa disa persona dyshohet se shërbenin si pararojë për automjetet që transportonin cigaret.
Në këtë skemë, sipas hetimeve, janë përfshirë rreth 14 persona të tjerë nga Gacko dhe komunat përreth. Grupi dyshohet se ka përdorur të paktën nëntë automjete dhe shpesh ka ndërruar targat e tyre.
Hetuesit dyshojnë se transportet kryheshin kryesisht gjatë mbrëmjes, në periudhën kur ndërroheshin patrullat kufitare, zakonisht mes orës 18:00 dhe 19:00.
Sipas burimeve të cituara në dosje, ndryshimi i turneve në pika fikse krijonte një periudhë prej rreth një ore kur rrugët e paligjshme malore mbeteshin pa mbikëqyrje të drejtpërdrejtë.
Cigaret fshiheshin në Gacko dhe më pas dërgoheshin në Sarajevë
Pasi kalonin kufirin, cigaret dyshohet se fshiheshin në zonat e Avtovacit dhe Lipnikut, për t’u transportuar më pas drejt pjesëve të tjera të Bosnjë e Hercegovinës.
Sipas hetimeve, shpejtësia e automjeteve ishte një tjetër element i rëndësishëm i mënyrës së funksionimit të grupit. Një nga shoferët madje ishte pagëzuar nga policia me nofkën “Fantazma”, pasi, sipas burimeve të hetimit, drejtonte me shpejtësi të tillë sa ishte e vështirë të ndiqej nga patrullat.
Në një rast, sipas një burimi të cituar nga BIRN, kontrabandistët mund të kalonin kufirin dhe të ktheheshin brenda rreth 10 minutash.
Nga depot e fshehta në Gacko, cigaret më pas shpërndaheshin në qytete të tjera përmes shitësve ambulantë.
Një pjesë e tyre kanë përfunduar edhe në rrugët e Sarajevës, ku një pako cigare kontrabandë është gjetur duke u shitur për 4.5 marka boshnjake, ose rreth 2.25 euro.
Në të njëjtën kohë, çmimi i pakos më të lirë të cigareve që shitet ligjërisht në Bosnjë e Hercegovinë arrin në rreth 6.2 marka, ose 3.10 euro.
Miletic dhe Zirojeviq kanë pranuar për BIRN se njihnin vëllezërit Predrag dhe Marko Cicmil nga Pluzhina, por kanë mohuar se kanë bashkëpunuar me ta në kontrabandën e cigareve. Të dy kanë pranuar se në të kaluarën kanë qenë të përfshirë në kontrabandë cigaresh dhe se për këtë janë arrestuar e proceduar disa herë.
Autoritetet e Republikës Srpska nuk iu përgjigjën kërkesave të BIRN për koment lidhur me rastin.
Post a Comment
0Comments