Ulqin: Ngecin negociatat për blerjen e objektit të papërfunduar në Qytetin e Vjetër

 

Negociatat për blerjen nga Komuna e Ulqinit të një objekti të papërfunduar në Qytetin e Vjetër ende nuk kanë rifilluar, pavarësisht se ekspertiza për vlerën e pronës është përfunduar që në korrik të vitit 2025.

Sipas informacioneve të “Ulqin Info”, pronarët e objektit i kanë dërguar në mesin e shtatorit një kërkesë urgjente kryetarit të Komunës së Ulqinit, Genci Nimanbegut, duke kërkuar që t’u dorëzohet ekspertiza dhe oferta për blerje, nëse Komuna vazhdon të jetë e interesuar për pronën.

Pronarët kanë deklaruar se, sipas informacioneve që kanë, vlerësimi i pronës është përfunduar prej kohësh.

Kështu, fati i objektit, të cilin shumë banorë e konsiderojnë një pamje të shëmtuar që dëmton imazhin e kalasë së vjetër, tashmë mbetet në duart e administratës së Komunës së Ulqinit.

Nimanbegu kishte deklaruar në qershor për “Vijesti” se pronarëve ua kishte dërguar më herët ekspertizën përmes postës elektronike dhe postës së rregullt. Megjithatë, nga kërkesa e tyre e fundit duket se dokumenti nuk u ka mbërritur.

Vlera e pronës mund të duhet të rivlerësohet

Ndërkohë, mbetet e paqartë nëse ekspertiza e kryer më shumë se një vit më parë mund të përdoret ende si bazë për një marrëveshje, duke pasur parasysh ndryshimet e mundshme të vlerës së tregut të pronës.

Negociatat për blerjen e objektit nisën në gjysmën e dytë të vitit 2024, pasi Nimanbegu mori detyrën e kryetarit të Komunës.

Sipas informacioneve jozyrtare, komisioni ekspertësh prej tre anëtarësh e nisi punën disa muaj më vonë dhe ekspertizën e përfundoi në fund të korrikut 2025.

Komuna e Ulqinit ishte porositëse e vlerësimit të pronës, e cila është në pronësi të kompanisë “SJ Property” nga Podgorica.

“Vijesti” kishte raportuar më herët, duke iu referuar burimeve jozyrtare, se objekti shumëkatësh në ndërtim, së bashku me tokën përkatëse, ishte vlerësuar në rreth 1.4 deri në 1.5 milionë euro.

Dy mundësi për zgjidhjen e problemit

Dy vite më parë, Nimanbegu kishte zhvilluar një takim me pronarët e objektit, ku ishte rënë dakord që të angazhoheshin ekspertë dhe të tentohej zhbllokimi i situatës.

Punimet në objekt kanë qenë të ndërprera për më shumë se një dekadë, ndërsa parcela ndërkohë është mbuluar nga bimësia dhe gjendja e saj paraqet shqetësim edhe për sigurinë e kalimtarëve.

Në tryezë ishin dy mundësi: kompensimi përmes një parcele tjetër në Pinjesh, Fushën e Ulqinit ose në ndonjë pjesë tjetër të qytetit ku Komuna është pronare, ose blerja e objektit së bashku me tokën përkatëse.

Nga kompania “SJ Property” më herët i kanë deklaruar “Vijestit” se qëndrimi i tyre nuk ka ndryshuar. Ata kanë thënë se mbeten të hapur për negociata, përfshirë edhe mundësinë e shkëmbimit të pronave mbi bazën e vlerës së përafërt të tyre.

Kompania kishte shpjeguar se tokën dhe objektin në Qytetin e Vjetër i kishte blerë me synimin për zhvillimin e një aktiviteti turistik të kategorisë së lartë, por më pas ishte përballur me pengesa administrative.

Komuna kishte bërë një ofertë edhe në vitin 2022

Edhe administrata e mëparshme lokale, në vitin 2022, i kishte ofruar kompanisë “SJ Property” blerjen e objektit të papërfunduar në Qytetin e Vjetër, ndërsa në këmbim do t’i jepej një parcelë në Pinjesh ose në Fushën e Ulqinit.

Kryetari i atëhershëm i Komunës, Omer Bajraktari, u kishte bërë të ditur pronarëve se në Qytetin e Vjetër nuk mund të ndërtonin dhe se, sipas tij, as në të ardhmen nuk do të mund ta vazhdonin ndërtimin. Për këtë arsye, ai e kishte paraqitur shkëmbimin si një zgjidhje të mundshme.

Kompania “SJ Property” u bë pronare e parcelës dhe objektit në vitin 2018. Që nga blerja, në pronë nuk janë kryer punime të tjera, pasi pronarët nuk kanë pasur mundësi ta vazhdojnë ndërtimin.

Pronari i mëparshëm ishte kompania “Butua Resort”.

Ndërtimi mbeti i bllokuar prej vitesh

Edhe pse pronarët e rinj kanë leje ndërtimi, ata nuk kanë mundur ta vazhdojnë projektin për shkak se nuk është miratuar Plani i Detajuar Urbanistik (DUP) për Qytetin e Vjetër.

Kompania “SJ Property” është themeluar më 21 shkurt 2018, ndërsa në qershor të të njëjtit vit ka blerë parcelën dhe objektin e papërfunduar në Qytetin e Vjetër.

Për shkak të tejkalimeve nga leja e ndërtimit, kompanisë së mëparshme “Ulcinj Resort” i ishte ndaluar ndërtimi në qershor të vitit 2009. Në atë kohë, Komuna kishte refuzuar kërkesën për legalizimin e dimensioneve ekzistuese që tejkalonin parametrat e lejuar.

Në vitin 2014, Drejtoria për Inspektime kishte deklaruar për “Vijesti” se inspektorati i ndërtimit kishte konstatuar se investitori posedonte leje ndërtimi, por punimet nuk po zhvilloheshin në përputhje me të.

Deri atëherë, investitori kishte përfunduar vetëm punimet bazë në katin përdhes dhe katin e parë. Objekti ka mbetur në të njëjtën gjendje edhe sot, ndërsa parcela është lënë pas dore dhe është mbuluar nga bimësia.

Në vitin 2017, Drejtoria për Mbrojtjen e Pasurive Kulturore i kishte bërë thirrje investitorit të atëhershëm që ta përfundonte objektin në Qytetin e Vjetër, në përputhje me projektin kryesor të vitit 2002, i cili kishte miratimin konservues.