Pranë Liqenit të Shkodrës sekuestrohen 185.5 kilogramë duhan, policia kërkon dy persona

 

Policia malazeze ka sekuestruar mbrëmjen e kaluar 185.5 kilogramë duhan të prerë në zonën e Liqenit të Shkodrës, në vendin e quajtur Šarova Topola. Sipas Policisë, vlera e mallit të sekuestruar llogaritet në rreth 13 mijë euro.

Operacioni u zhvillua nga efektivët e Sektorit të Policisë Kufitare dhe Stacionit të Policisë Kufitare I në Podgoricë, në kuadër të kontrolleve për zbulimin dhe parandalimin e kontrabandës së mallrave përmes kufirit shtetëror.

Dy automjete pa targa u vunë re nga policia

Sipas njoftimit të policisë, rreth orës 19:00, gjatë patrullimit dhe mbikëqyrjes së zonës pranë kufirit me Shqipërinë, efektivët po kontrollonin territorin me një automjet zyrtar dhe me ndihmën e një droni.

Gjatë vëzhgimit, policia dalloi dy automjete, një “Citroen C3” dhe një “VW Golf II”, të dyja pa targa regjistrimi.

Efektivët u dhanë shoferëve sinjal për ndalim përmes sinjaleve zanore dhe dritore, por drejtuesit nuk iu bindën urdhrit. Ata shtuan shpejtësinë dhe u larguan nga vendi i ngjarjes.

Duhani u braktis gjatë ndjekjes

Sipas dyshimeve të policisë, personi që transportonte duhanin e hodhi ngarkesën sapo vuri re efektivët.

Policia dyshon se duhani ishte futur kontrabandë nga Shqipëria, me qëllim shitjen e mëtejshme të paligjshme në Mal të Zi.

Efektivët nisën ndjekjen e automjeteve dhe, gjatë kontrollit të terrenit, gjetën “VW Golf II” të fshehur në një zonë me pyll të dendur, jashtë një rruge të paasfaltuar.

Në automjet dhe në afërsi të tij nuk u gjet personi që e drejtonte.

371 pako me duhan

Pranë automjetit, policia gjeti 13 qese të mëdha PVC të zeza, disa prej të cilave ishin pjesërisht të grisura.

Brenda tyre kishte gjithsej 371 pako të vogla prej letre, me peshë nga 0.5 kilogramë secila. Në total, sasia e duhanit të prerë arrinte në 185.5 kilogramë, me vlerë të përllogaritur rreth 13 mijë euro.

Ndërkohë, drejtuesi i “Citroen C3” arriti të largohej me automjet gjatë ndjekjes.

Policia po punon për gjetjen e tij, si dhe për identifikimin dhe lokalizimin e personit që drejtonte “VW Golf II” dhe që dyshohet se transportonte duhanin e kontrabanduar.

Rasti po hetohet nga prokuroria

Në vendin e ngjarjes është kryer këqyrja nga ekipet përkatëse. Për rastin është njoftuar prokurori shtetëror në Prokurorinë Themelore të Podgoricës.

Sipas udhëzimeve të prokurorit dhe në koordinim me të, policia do të ndërmarrë veprime të mëtejshme për zbardhjen e plotë të rastit dhe identifikimin e personave të përfshirë.