Një aksident i rëndë trafiku ka ndodhur mëngjesin e sotëm në Bavari të Gjermanisë, ku një autobus turistik është përmbysur në autostradën A96, pranë Buhlut. Si pasojë, dy persona kanë humbur jetën, ndërsa disa të tjerë janë plagosur, mes tyre tetë në gjendje të rëndë.
Autobusi, i regjistruar në Itali, ka dalë nga rruga për arsye ende të paqarta dhe ka përfunduar në një skarpë pranë autostradës. Sipas informacioneve paraprake, nuk ka pasur përplasje me automjete të tjera.
Aksidenti ndodhi rreth orës 06:00, pranë daljes Buhluh-East, në drejtim të Mynihut. Sipas policisë së Bavarisë së Epërme, në autobus ndodheshin rreth 50 persona, të gjithë pjesë e një grupi turistik nga Filipinet.
Një person ndërroi jetë në vendngjarje, ndërsa një tjetër, i cili fillimisht ishte në rrezik për jetën, nuk arriti t’u mbijetojë plagëve të marra.
Sipas informacioneve të deritanishme, udhëtarët kishin nisur nga Milanoja dhe po udhëtonin drejt Mynihut, ku planifikonin të merrnin pjesë në festivalin Oktoberfest.
Hetimet për shkakun e aksidentit
Policia ka bërë të ditur se autobusi doli nga ana e djathtë e rrugës dhe më pas u përmbys në terrenin anësor të autostradës. Xhami i përparmë i autobusit është shkatërruar plotësisht.
Shkaku i aksidentit ende nuk është përcaktuar. Prokuroria ka angazhuar një ekspert për të rindërtuar dinamikën e ngjarjes dhe për të përcaktuar se çfarë e detyroi autobusin të dilte nga rruga.
Në vendngjarje janë angazhuar një numër i madh i ekipeve të emergjencës, ndërsa gjatë mëngjesit mbi zonë ka qarkulluar edhe një helikopter.
Për shkak të pozitës së rrezikshme, zjarrfikësit e kanë siguruar autobusin e përmbysur në skarpë me litarë dhe mbështetëse prej druri, ndërsa operacioni i shpëtimit dhe hetimet kanë vazhduar në terren.
Post a Comment
0Comments