Kreu i Forumit Shqiptar, Nik Gjeloshaj, ka njoftuar se i ka dërguar kryeministrit të Malit të Zi, Milojko Spajiq, një kërkesë për zbatimin e plotë të detyrimeve politike, kadrovike dhe zhvillimore të përcaktuara në marrëveshjen për formimin e Qeverisë së 44-të.
Forumi Shqiptar kërkon që Qeveria, brenda 30 ditësh, të paraqesë një plan konkret për realizimin e detyrimeve të dakordësuara. Ndër kërkesat janë konsultimet e rregullta me partnerët e koalicionit, përfaqësimi i barabartë i shqiptarëve në institucione, reforma zgjedhore, mbështetja më e madhe financiare për komunat dhe përshpejtimi i projekteve kapitale në komunat ku shqiptarët përbëjnë shumicën.
Forumi Shqiptar ka bërë të ditur se do të vazhdojë të mbështesë rrugën evropiane dhe stabilitetin e Qeverisë, ndërsa ka paralajmëruar se do të shqyrtojë formën dhe nivelin e pjesëmarrjes së tij në pushtetin ekzekutiv nëse nuk ka përparim të dukshëm në zbatimin e marrëveshjes. Në të njëjtën kohë, Forumi ka deklaruar se nuk do të mbështesë iniciativa që synojnë rrëzimin e Qeverisë së 44-të.
Në dokument, Forumi Shqiptar thekson se kërkesat lidhen me respektimin e marrëveshjes, partneritetin politik, të drejtat e shqiptarëve, decentralizimin, zhvillimin lokal, ekonominë dhe bujqësinë.
Partneriteti politik dhe zbatimi i marrëveshjes
Forumi kërkon krijimin e një mekanizmi të rregullt konsultimi ndërmjet liderëve të partive të shumicës parlamentare, si dhe konsultime të detyrueshme para marrjes së vendimeve që prekin partnerët e koalicionit.
Gjithashtu kërkohet zbatimi i plotë i marrëveshjeve kadrovike të dakordësuara dhe përfaqësim i përshtatshëm i shqiptarëve në administratën shtetërore, institucionet publike, ndërmarrjet shtetërore dhe institucionet e tjera.
Forumi kërkon që Qeveria të paraqesë një pasqyrë të detyrimeve të realizuara dhe atyre të parealizuara, arsyet e vonesave dhe afatet konkrete për përmbushjen e tyre.
Kërkohet që brenda 30 ditësh të dërgohet një përgjigje me shkrim dhe të zhvillohet një takim ndërmjet kryeministrit Spajiq dhe përfaqësuesve të Forumit Shqiptar. Sipas kërkesës, përgjigjja duhet të përmbajë një plan veprimi me institucionin përgjegjës, personin përgjegjës, fondet e nevojshme, afatet dhe rezultatet e pritshme.
Të drejtat e shqiptarëve dhe reforma zgjedhore
Në dokument kërkohet zbatim i plotë i të drejtave të pakicave, përfshirë përdorimin zyrtar të gjuhës shqipe dhe përdorimin e simboleve kombëtare aty ku plotësohen kushtet ligjore.
Forumi Shqiptar kërkon gjithashtu ndryshime në legjislacionin zgjedhor për t’u garantuar një numër mandatesh listave autentike shqiptare përmes një modeli të veçantë të afirmimit politik.
Një tjetër kërkesë është përgatitja e një analize zyrtare për përfaqësimin e shqiptarëve në sektorin publik dhe hartimi i një plani për adresimin e disproporcioneve të konstatuara.
Decentralizimi dhe projektet kapitale
Forumi kërkon ndryshime në financimin e komunave, në mënyrë që ato të mos humbin të ardhura dhe të kenë mundësi të realizojnë projektet e tyre zhvillimore.
Në dokument përmenden edhe projektet kapitale në Tuz, Ulqin, Plavë dhe Guci, për të cilat kërkohet informacion i detajuar mbi statusin, dokumentacionin, tenderët dhe afatet e realizimit.
Në kuadër të decentralizimit, Forumi Shqiptar kërkon edhe:
- më shumë kompetenca për komunat bregdetare dhe një shpërndarje më të drejtë të të ardhurave;
- zgjidhjen e statusit të Ulqinit si qytet;
- përfundimin e ndarjes së territorit dhe pronës ndërmjet Tuzit dhe Podgoricës;
- përgatitjen e një pakete masash për decentralizimin politik, administrativ dhe fiskal;
- nisjen e dialogut institucional dhe përgatitjen e analizave juridike, ekonomike dhe territoriale për formimin e komunës urbane të Krajinës, e cila do të përfshinte bashkësitë lokale Ostros dhe Gjyraç;
- përshpejtimin e procedurave për vënien në funksion të pikës së përbashkët kufitare Ckla–Zogaj.
Mbështetje për ekonominë dhe bujqësinë
Në pjesën ekonomike, Forumi Shqiptar kërkon rritjen e mbështetjes për prodhimin vendas dhe bujqësinë, si dhe rritjen e Buxhetit Bujqësor.
Ndër propozimet janë edhe ulja e TVSH-së për frutat dhe perimet e freskëta, mbështetja për modernizimin e prodhimit dhe rritja e fondeve për eksportin dhe konkurrueshmërinë e ndërmarrjeve të vogla dhe të mesme.
Forumi kërkon gjithashtu riorganizimin e kompanisë “Plodovi Crne Gore” dhe aktivizimin e saj për blerjen, magazinimin, paketimin, përpunimin dhe shitjen e produkteve bujqësore vendase.
Qëndrimi ndaj Qeverisë
Forumi Shqiptar ka deklaruar se do të vazhdojë të mbështesë agjendën evropiane të Malit të Zi dhe stabilitetin politik. Megjithatë, ka theksuar se pjesëmarrja e tij në pushtetin ekzekutiv duhet të ketë përmbajtje konkrete politike dhe programore.
Nëse brenda afateve të përcaktuara nuk ka përparim të dukshëm në respektimin e marrëveshjes dhe zbatimin e detyrimeve, organet përkatëse të Forumit Shqiptar do të shqyrtojnë formën dhe nivelin e pjesëmarrjes së mëtejshme në Qeveri.
Post a Comment
0Comments