Në portin e Tivarit 102 tonë mishit i ka skaduar afati

 

Mali i Zi ka pezulluar importin e mishit të viçit dhe shpendëve nga Brazili, pasi ky shtet nuk është më në listën e vendeve të treta nga të cilat, sipas rregullave të Bashkimit Evropian, lejohet importi i këtyre produkteve.

Vendimi u mor pas kontrollit të një sasie mishi nga Brazili, e cila është bllokuar në Portin e Tivarit dhe ishte destinuar për transit drejt Kosovës.

Drejtori i Administratës për Sigurinë Ushqimore, Veterinarinë dhe Çështjet Fitosanitare, Vladimir Gjokoviq, tha për TV Podgorica se mishi i certifikuar deri më 3 shtator mund të përdoret, ndërsa për produktet e certifikuara nga 4 shtatori vlen ndalimi i importit.

Sipas tij, vendimi lidhet me masat e Bashkimit Evropian ndaj Brazilit dhe me pamundësinë për të garantuar se në prodhimin e këtyre produkteve nuk janë përdorur substanca dhe antibiotikë të caktuar që mund të shërbejnë si stimulues të rritjes.

Në port ndodhen 102 tonë mish

Në terminalin e Portit të Tivarit ndodhen katër kontejnerë me rreth 102 tonë mish, i cili është nën kontroll doganor.

“Administrata, pasi mori informacionin nga Administrata Doganore, fillimisht mori mostra nga tre kontejnerë. Më pas u konstatua se bëhej fjalë për mish me afat të skaduar”, deklaroi Gjokoviq.

Ai tha se në raste të tilla produkti shpallet menjëherë i papajtueshëm për çdo treg, ndërsa urdhërohet kthimi ose asgjësimi i tij në përputhje me ligjin.

Autoritetet: Mishi i pasigurt nuk mund të shitet

Rasti ka rikthyer në vëmendje çështjen e sigurisë së mishit në tregun malazez. Ndërsa një pjesë e qytetarëve besojnë te kontrollet zyrtare, të tjerë shprehin shqetësime për origjinën dhe cilësinë e produkteve të importuara.

Gjokoviq siguroi se mishi me origjinë të dyshimtë nuk mund të dalë në shitje në Mal të Zi.

Sipas tij, mishi që vendoset në treg duhet t’i nënshtrohet kontrolleve veterinare dhe doganore në pikat kufitare. Përveç kësaj, përmes programeve të monitorimit merren rregullisht mostra nga produktet, ndërsa inspektorët kryejnë kontrolle në objektet e shitjes me pakicë.

“Siguria ushqimore nuk njeh rrezik zero”, theksoi Gjokoviq.

Rasti i mishit nga Brazili ka hapur edhe çështjen e varësisë së tregut malazez nga importi, ndërsa autoritetet theksojnë rëndësinë e kontrolleve të origjinës, cilësisë dhe sigurisë së produkteve para se ato të arrijnë te konsumatorët.