Një përleshje masive ku morën pjesë më shumë se 20 të rinj, djem dhe vajza, ka ndodhur të shtunën në mbrëmje në qendër të Postojnës, pranë një lokali në rrugën Trzaska.
Sipas raportimeve, në përleshje janë përdorur grushte dhe shqelma, ndërsa disa nga pjesëmarrësit janë përplasur edhe me automjete. Pamjet e incidentit kanë nxitur reagimin e autoriteteve lokale dhe policisë.
Policia sllovene është duke punuar për identifikimin e të gjithë personave të përfshirë, ndërsa po heton edhe dyshimet për vepra penale që lidhen me kërcënime dhe sjellje të dhunshme.
Policia mbërriti pasi pjesëmarrësit ishin larguar
Policia e Koperit ka marrë njoftimin për përleshjen në orën 01:20, ndërsa patrullat janë dërguar në rrugën Tržaška.
Kur policia mbërriti në vendngjarje, shumica e personave të përfshirë ishin larguar. Në vend u gjet vetëm një 22-vjeçar me lëndime të lehta.
Zyrtarët policorë kryen këqyrjen e vendit të ngjarjes dhe siguruan prova që mund të ndihmojnë në hetimin e rastit.
Zëdhënësja e Drejtorisë së Policisë së Koperit, Anita Leskovec, tha se hetimi është ende në zhvillim.
“Po vazhdojmë me intensitet mbledhjen e informacionit, pasi hetimi ende nuk ka përfunduar. Policët e Postojnës duhet t’i identifikojnë të gjithë pjesëmarrësit në përleshje dhe të zhvillojnë intervista me ta”, deklaroi Leskovec.
Mund të shkurtohet orari i lokalit
Incidenti ka shkaktuar reagime edhe në administratën komunale të Postojnës.
Për shkak të situatës, autoritetet lokale kanë paralajmëruar mundësinë e shkurtimit të orarit të punës së lokalit “Muzik”, para të cilit ndodhi përleshja.
Orari i rregullt i objektit është deri në 22:00, ndërsa komuna kishte lejuar që një herë në muaj të punojë deri në 02:00 pas mesnate.
Policia ndërkohë po vazhdon hetimet për të përcaktuar saktësisht se çfarë ka ndodhur, si dhe për të identifikuar të gjithë personat që kanë marrë pjesë në përleshje.
Post a Comment
0Comments