Presidenti i Malit të Zi, Jakov Milatoviq, ka bërë të ditur se të enjten në Podgoricë do të organizojë një tryezë të rrumbullakët kushtuar “Euro Modelit”, programit ekonomik të kryeministrit Milojko Spajiq që parashikon rritje të pagave dhe pensioneve.
Milatoviq tha se në këtë takim do ta ftojë Spajiqin, si dhe përfaqësues të tjerë të interesuar nga fusha e ekonomisë dhe shoqërisë, me qëllim që të shqyrtohen në mënyrë më të plotë efektet dhe qëndrueshmëria e programit.
“Kam thënë në vlerësimin tim për programin se është mirë që fokusi është rikthyer te rritja e pagave dhe pensioneve. Më duket se temat që kanë qenë aktuale në periudhën e kaluar nuk e kanë çuar Malin e Zi përpara. E kam fjalën për (Ratko) Mlladiqin dhe të gjitha ato çështje që janë pjesë e një të kaluare të dhimbshme të këtij rajoni”, deklaroi Milatoviq.
Sipas tij, Mali i Zi sot po ecën përpara në një mënyrë të ndryshme në raport me vendet e tjera të Ballkanit Perëndimor. Për këtë arsye, ai e ka vlerësuar si hap pozitiv vendimin e qeverisë për ta vendosur në fokus rritjen e pagave dhe pensioneve.
Milatoviq ngre tre çështje për “Euro Modelin”
Presidenti tha se lidhur me programin mbeten tri çështje për të cilat, sipas tij, ende nuk janë dhënë përgjigje të mjaftueshme.
E para lidhet me pyetjen nëse “Euro Modeli” është fiskalisht neutral dhe i qëndrueshëm, ndërsa e dyta ka të bëjë me politikën e pagave.
Milatoviq tha se, nga ajo që ka parë deri tani, diferenca e parashikuar në pagat minimale mes niveleve të ndryshme të arsimit është relativisht e vogël.
“Pjesa e shtesës për arsimim më duket shumë e vogël në raport me pagën minimale – si për ata që kanë përfunduar arsimin fillor, ashtu edhe për ata me arsim të mesëm. Në këtë mënyrë dërgohet një mesazh jo i mirë për sistemin tonë arsimor dhe motivimin e njerëzve për t’u arsimuar”, tha ai.
Çështja e tretë, sipas Milatoviqit, është sistemi pensional, të cilin ai e konsideroi më kompleksin.
“Pensioni, dukshëm, po kalon nga një kategori ekonomike në një kategori sociale”, u shpreh presidenti.
Çfarë parashikon “Euro Modeli”?
Kryeministri Milojko Spajiq e prezantoi më 17 shtator programin, i cili sipas Qeverisë do të zbatohet nga janari i vitit 2027. Modeli parashikon pagë minimale prej 1.000 eurosh për vendet e punës që kërkojnë arsim fillor ose më të ulët, 1.250 euro për ato me arsim të mesëm dhe 1.400 euro për pozicionet që kërkojnë arsim të lartë.
Qeveria ka miratuar edhe një paketë ligjesh që synon mundësimin e zbatimit të modelit të ri të llogaritjes së pagave nga fillimi i vitit të ardhshëm.
Spajiq ka deklaruar gjithashtu se nga viti 2027 pensionet do të harmonizohen katër herë në vit, në mënyrë që të ndjekin rritjen e pagave.
“Nuk kam qenë kritik personal i Spajiqit”
Duke komentuar vlerësimet se ka qenë kritik i ashpër ndaj kryeministrit dhe politikave të tij, Milatoviq tha se është e gabuar të përshkruhet si “kritik i Spajiqit”.
“Gjërat në politikë nuk duhet të shihen në mënyrë kaq personale. Politikat me të cilat nuk jam pajtuar i kam komentuar shumë qartë. E di që gazetarët duan ta vendosin marrëdhënien tonë në një kontekst personal, por të paktën nga ana ime nuk ka pasur asgjë personale”, tha ai.
Milatoviq shpjegoi se pas kthimit nga Nju Jorku, ku mori pjesë në punimet e Asamblesë së Përgjithshme të Kombeve të Bashkuara, kishte pasur mundësi të njihej më në detaje me gjashtë ligjet që lidhen me “Euro Modelin” dhe që janë miratuar nga Qeveria.
Sipas tij, hapi i ardhshëm është dërgimi i tyre në procedurë parlamentare. Megjithatë, ai kritikoi faktin se ligjet janë miratuar pa një debat paraprak publik.
“Problemi është se ato u miratuan në mënyrë të nxituar dhe nuk pati asnjë debat publik”, tha Milatoviq.
Milatoviq kritikon mungesën e kuorumit në Kuvend
Duke folur për mungesën e kuorumit në seancën e Kuvendit ku duhej të diskutohej shkarkimi i kryetarit të parlamentit, Andrija Mandiq, Milatoviq tha se ajo që ka ndodhur nuk është e mirë për demokracinë parlamentare.
Ai theksoi se çdo deputet ka të drejtë të ketë qëndrimin e tij, por sipas tij, shmangia e debatit për një çështje të tillë i dërgon një mesazh të keq publikut.
“Çdo deputet ka të drejtë të ketë qëndrimin e vet, por ajo që pamë ishte, sipas meje, një qasje shumë e papërgjegjshme ndaj gazetarëve dhe, në këtë mënyrë, edhe ndaj publikut”, tha presidenti.
Milatoviq shtoi se mungesa e kuorumit nuk është diçka e re dhe përmendi edhe një seancë të jashtëzakonshme që kishte iniciuar më herët.
“Sjelljes së papërgjegjshme institucionale nuk duhet t’i përgjigjemi me papërgjegjshmëri institucionale. Mendoj se në këtë mënyrë thellohet kriza dhe kjo nuk është mirë për demokracinë parlamentare, por as për mesazhin që i dërgojmë partnerëve tanë evropianë”, deklaroi ai.
Debati për Mandiqin dhe ndryshimet kushtetuese
Nisma për shkarkimin e Mandiqit lidhet me telegramin e tij publik të ngushëllimit pas vdekjes së Ratko Mlladiqit, i cili është dënuar për gjenocidin në Srebrenicë, krime kundër njerëzimit dhe krime të tjera lufte.
Kërkesën për shkarkimin e tij e ka paraqitur opozita e udhëhequr nga Partia Demokratike e Socialistëve (DPS).
Nga DPS kanë deklaruar se qëndrimi i tyre nuk ka ndryshuar dhe se nuk do të ketë bashkëpunim institucional me Qeverinë dhe shumicën parlamentare derisa deputetëve t’u mundësohet të votojnë për shkarkimin e Mandiqit.
Ndërkohë, në procedurën parlamentare ndodhen dy propozime për ndryshime kushtetuese. Njëri lidhet me verifikimin e integritetit para marrjes së detyrës në pushtetin ekzekutiv, ndërsa tjetri synon heqjen e imunitetit të anëtarëve të Qeverisë për veprat penale të korrupsionit.
Post a Comment
0Comments