Arrestohen dy persona në Podgoricë pas trajtimeve kozmetike, dyshohet për shkelje të rënda ndaj shëndetit

 

Policia e Podgoricës ka arrestuar një shtetase ukrainase, Y.K., dhe shtetasin malazez D.L., nën dyshimin se kanë kryer vepra penale kundër shëndetit të njerëzve ndaj tre grave të dëmtuara.

Sipas Drejtorisë së Policisë, arrestimi i Y.K. është bërë me urdhër të prokurorit shtetëror në Prokurorinë Themelore të Shtetit në Podgoricë.

Ndërkohë, është arrestuar edhe D.L. (41), shtetas i Malit të Zi, nën dyshimin për tregti të paligjshme, si dhe vepër të rëndë penale kundër shëndetit të njerëzve, në lidhje me prodhimin dhe vendosjen në qarkullim të produkteve të dëmshme.

Dy paciente u paraqitën në KCCG pas trajtimit

Rasti u raportua në shërbimin kujdestar të Departamentit të Sigurisë në Podgoricë nga një punonjës i Qendrës Klinike të Malit të Zi (KCCG).

Sipas policisë, në KCCG ishin paraqitur dy paciente pas trajtimeve që kishin kryer dhe pas aplikimit të një preparati që pretendohej se ishte toksinë botulinike.

Policia reagoi menjëherë dhe nisi veprimet për zbardhjen e rastit, të cilat çuan në identifikimin e dy të dyshuarve.

Të dy janë shoqëruar në ambientet e policisë, ku janë marrë në pyetje lidhur me rastin.

Gjatë kontrollit u gjetën sende që dyshohet se lidhen me rastin

Me njoftimin e prokurorit shtetëror në Prokurorinë Themelore të Shtetit në Podgoricë, është kontrolluar banesa dhe ambiente të tjera që përdorte Y.K.

Gjatë kontrollit janë gjetur sende për të cilat dyshohet se mund të jenë të lidhura me kryerjen e veprës penale. Sendet janë sekuestruar dhe do t’i nënshtrohen ekspertizës.

Pas shqyrtimit të materialeve të mbledhura, prokurori kompetent ka vlerësuar se në veprimet e Y.K.ekzistojnë elementet e veprës së rëndë penale kundër shëndetit të njerëzve, në lidhje me veprën ushtrim i paligjshëm i mjekësisë.

Për D.L., prokuroria ka konstatuar dyshime për tregti të paligjshme dhe vepër të rëndë kundër shëndetit të njerëzve, në lidhje me prodhimin dhe vendosjen në qarkullim të produkteve të dëmshme.

Të dy të dyshuarit do të dërgohen, së bashku me kallëzimet penale, brenda afatit ligjor para prokurorit shtetëror në Prokurorinë Themelore të Shtetit në Podgoricë për procedim të mëtejshëm.