22-vjeçari humb jetën në Koloseum, ra nga 10 metra lartësi

 

Një aksident tragjik ka ndodhur në Koloseum në Romë, ku një punëtor 22-vjeçar humbi jetën pasi ra nga një lartësi prej rreth 10 metrash.

Sipas informacioneve të publikuara, viktima është identifikuar si Andrea Moreti, specialist për punë në lartësi. Ai po punonte gjatë natës mes së martës dhe së mërkurës në instalimin e një sistemi të ri ndriçimi për monumentin.

Aksidenti ndodhi në nivelin e dytë të amfiteatrit, kur i riu, për arsye që ende nuk janë bërë të ditura, ra nga lartësia.

Pavarësisht ndërhyrjes së shërbimeve emergjente, 22-vjeçari nuk arriti t’u mbijetojë plagëve të marra.

Pas ngjarjes, niveli i dytë i Koloseumit, ku ndodhi aksidenti, është mbyllur përkohësisht.

Autoritetet kanë nisur hetimet për të përcaktuar rrethanat e sakta të aksidentit dhe për të sqaruar se si ndodhi rënia fatale gjatë punimeve.