Sipërmarrës dhe kompani nga Ulqini kanë dhuruar një donacion në vlerë prej rreth 20 mijë eurosh për Spitalin e Përgjithshëm në Tivar, duke mundësuar përmirësimin e kushteve për pacientët dhe stafin mjekësor.
Në kuadër të donacionit, ambulanca e pranimit, shërbimi i radiologjisë dhe reparti i neurologjisë janë pajisur me mobilie të reja, shtretër, dollapë për pacientët, hapësira për ruajtjen e barnave dhe materialeve mjekësore, si dhe mobilie për punën e mjekëve dhe personelit shëndetësor.
Kneževiq: Çdo mbështetje sjell cilësi të re
Drejtori i Spitalit të Përgjithshëm në Tivar, dr. Mirosllav Kneževiq, falënderoi sipërmarrësit nga Ulqini për kontributin, duke theksuar rëndësinë e solidaritetit dhe bashkëpunimit mes komunitetit dhe institucioneve shëndetësore.
Ai tha se synimi është që spitali të forcojë kapacitetet dhe stafin dhe, si institucion referues për këtë rajon, të ofrojë shërbime shëndetësore në nivel sa më të lartë.
“Duam t’i forcojmë kapacitetet dhe stafin. Çdo mbështetje dhe ndihmë është e mirëseardhur dhe nënkupton cilësi të re dhe përparim në punë. Duam që pacientët të ndihen më rehat, ndërsa stafi të ketë kushte më të mira për punë”, tha dr. Kneževiq.
Sipas tij, donacioni ka përmirësuar kushtet e punës për personelin mjekësor dhe qëndrimin e pacientëve në ambulancën e pranimit dhe bllokut urgjent, në shërbimin e radiologjisë dhe në neurologji.
“Me këtë donacion e keni plotësuar përmbajtjen dhe funksionin e këtyre kapaciteteve”, theksoi Kneževiq.
Ai shprehu shpresën se bashkëpunimi me sipërmarrësit do të vazhdojë, në të mirë të pacientëve nga Ulqini, Tivari dhe qytete të tjera, por edhe të turistëve dhe punonjësve të institucionit shëndetësor.
Iniciativa erdhi nga neurologu Ardit Tela
Iniciativën për realizimin e donacionit e kishte ndërmarrë dr. Ardit Tela, neurolog, i cili mori falënderimet e bashkëqytetarëve dhe sipërmarrësve për angazhimin.
Sipërmarrësi Kabil Kurti tha se shëndeti duhet të jetë në qendër të vëmendjes së çdo komuniteti.
“Pyetja e parë në komunikim është si është shëndeti dhe pastaj si është biznesi. Nëse nuk kemi shëndet, nuk kemi asgjë. Paratë janë një provë në jetë për të parë se sa është njeriu i aftë t’i ndajë për njerëzit, shëndetësinë, studentët dhe infrastrukturën”, tha Kurti.
Ai shtoi se sipërmarrësit janë bashkuar për të ndihmuar Spitalin e Përgjithshëm në Tivar dhe falënderoi drejtorin Kneževiq, dr. Telën dhe biznesmenët që kontribuuan në realizimin e donacionit.
Kush kontribuoi në donacion
Në aksion morën pjesë sipërmarrës dhe kompani nga Ulqini dhe rrethina:
- Arian Milla – Agris DOO dhe Cungu Company
- Lam Kallaba – Kallaba Company
- Kabil Kurti – Tapicer Kurti
- Muslim Llolla – Llolla Company
- Dritan Pulti – HVAC Solution
- Gazmen Demiroviq – Lamiga Group
- Jakup Đeljosheviq – Rapex Bar
- Ardit Tela
Falë pajisjeve të reja, pacientët tani kanë kushte më të mira gjatë qëndrimit në spital, ndërsa punonjësit kanë një ambient më funksional për kryerjen e detyrave të tyre.
Kompania “Kurti” nga Ulqini, e cila këtë vit shënon 30 vjet nga themelimi, prej kohësh kontribuon me mjete për pajisjen e dhomave të pacientëve dhe për përmirësimin e kushteve për personelin mjekësor.
Donacioni i fundit paraqet vazhdim të kësaj praktike, së cilës kësaj radhe iu bashkuan edhe një numër i konsiderueshëm sipërmarrësish nga Ulqini dhe Tivari.
Post a Comment
0Comments