Policia në Podgoricë ka arrestuar N.A., 29 vjeç, nën dyshimin për prodhim, posedim dhe shpërndarje të paautorizuar të lëndëve narkotike. Gjatë kontrollit të banesës dhe automjetit të tij, janë gjetur 550 gramë marihuanë, tableta MDMA, pajisje për matjen dhe paketimin e drogës, si dhe 4.505 euro.
Sipas Drejtorisë së Policisë, paratë dyshohet se janë përfituar nga shitja e narkotikëve.
Droga u gjet në banesë, oborr dhe në një lodër prej pelushi
Bazuar në informacionet operative, policia ka siguruar nga Gjykata e Lartë në Podgoricë urdhër për kontrollin e banesës dhe automjetit të të dyshuarit.
Gjatë kontrollit të banesës, në njërën prej dhomave janë gjetur disa paketime me gjithsej 50 gramë marihuanë, një kuti me një sasi më të vogël tabletash MDMA dhe 4.505 euro.
Në oborr, policia ka gjetur një çantë shpine, brenda së cilës ndodheshin dy paketime me 260 gramë marihuanë, dy peshore precize dhe materiale që dyshohet se përdoreshin për paketimin e drogës.
Ndërkaq, gjatë kontrollit të një automjeti të markës “Nissan”, zyrtarët kanë gjetur një lodër prej pelushi, brenda së cilës ishin fshehur edhe 28 paketime me gjithsej 240 gramë marihuanë.
Sekuestrohen edhe automjeti dhe pajisjet e komunikimit
Policia ka sekuestruar të gjithë sasinë e marihuanës, tabletat MDMA, pajisjet për matjen dhe paketimin e lëndëve narkotike, si dhe paratë e gjetura.
Përveç tyre, të dyshuarit i janë sekuestruar përkohësisht edhe automjeti dhe pajisjet e komunikimit.
Nga Drejtoria e Policisë kanë njoftuar se 29-vjeçari do t’i dorëzohet prokurorit shtetëror kompetent, brenda afatit ligjor, së bashku me kallëzimin penal për veprën për të cilën dyshohet.
I dyshuari gëzon prezumimin e pafajësisë deri në një vendim të formës së prerë të gjykatës.
Post a Comment
0Comments