Presidenti amerikan Donald Trump ka deklaruar se asnjë vend nuk duhet të ketë norma interesi më të ulëta se Shtetet e Bashkuara të Amerikës, duke u shprehur pak ditë para mbledhjes së Rezervave Federale se SHBA-ja “duhet të paguajë normën më të ulët të interesit në botë”, pavarësisht të dhënave të bankës qendrore mbi inflacionin dhe gjendjen e ekonomisë.
Trump u shpreh se nuk e di nëse krijuesit e politikës monetare këtë javë do t'i rrisin normat e interesit, ndërkohë që raporti i fundit mbi çmimet e konsumit tregoi rritjen më të lartë mujore në katër muajt e fundit dhe shtoi pritshmëritë se Fed, në përfundim të mbledhjes të mërkurën, mund të rrisë normën e synuar të interesit, e cila aktualisht gjendet në diapazonin prej 3.50 deri në 3.75 për qind.
Trump ushtron sërish presion ndaj bankës qendrore.
Presionet inflacioniste mbeten të larta për shkak të rritjes së tarifave të importit të SHBA-së dhe rritjes së çmimeve të energjisë që lidhen me luftën në Iran, siç raporton RTÉ, ndërsa Trump, popullariteti i të cilit është goditur nga inflacioni këmbëngulës, pohon se politika e normave të larta ndihmon shtetet e tjera në dëm të SHBA-së, duke deklaruar: “Unë di më shumë rreth formulave se kushdo tjetër, dhe me rejtingun më të mirë të kreditimit në botë, ne po i bëjmë vendet e tjera të pasura.”
Presidenti, i cili më parë ka kritikuar shpesh ish-kreun e Fed-it, Jerome Powell, ka treguar më shumë mbështetje për bankën qendrore që kur në krye të saj erdhi kandidati i tij, Kevin Warsh, por së fundmi ka kërcënuar se će pezullojë tregtinë me vendet me të cilat SHBA-ja ka deficit, nëse normat e interesit nuk ulen. Ndërkohë, drejtori i Këshillit Kombëtar Ekonomik, Kevin Hassett, ka deklaruar se Trump do të mbrojë pavarësinë e Warsh pavarësisht vendimit të Fed-it.
Post a Comment
0Comments