Kontrolle në gjashtë qytete të veriut në Mal të Zi: U sekuestrua një automjet, armë zjarri, municion, u arrestua një person

 

Pjesëtarët e Qendrës Rajonale të Sigurisë “Veri” dje kanë kryer gjithsej 12 kontrolle të banesave dhe hapësirave të tjera në gjashtë qytete.

Nga Drejtoria e Policisë bëjnë të ditur se gjatë këtyre kontrolleve kanë gjetur dhe sekuestruar përkohësisht 11 copë armë zjarri – shtatë pushkë dhe katër pistoleta, 430 copë municion të markave dhe kalibrave të ndryshëm, si dhe një automjet luksoz të markës “Porsche Macan”. Një person është arrestuar për shkak të armëmbajtjes dhe posedimit të paligjshëm të municionit.

“Në fakt, zyrtarët e Departamentit të Sigurisë Plavë kanë kryer kontrollin e banesës dhe hapësirave të tjera që shfrytëzohen nga Z.H. në Plavë, me ç’rast është gjetur dhe sekuestruar përkohësisht një pushkë gjuetie me dylbi të markës “Zastava”, e kalibrit 8×57, me 5 copë municion përkatës, e cila është pronë e një personi tjetër dhe për të cilën Z.H. nuk posedon dokumentacion, si dhe një pistoletë e markës “Zastava” M57, e kalibrit 7,62 mm, me kornizë në të cilën ndodheshin 8 copë municion pistoletësh përkatës, i cili gjithashtu ishte në posedim të paligjshëm të këtij personi. Me atë rast u gjetën gjithashtu 37 copë municion pistoletësh të kalibrit 7,62 mm, 2 copë municion pistoletësh me kalibër të panjohur (NN), si dhe një pushkë automatike e markës së panjohur, me kornizë në të cilën ndodheshin 30 copë municion pushke përkatës të kalibrit 7,62 mm. Me urdhër të prokurorit kompetent, Z.H. është privuar nga liria për shkak të dyshimit se ka kryer veprën penale ‘mbajtja dhe bartja e paligjshme e armëve dhe e lëndëve plasëse’, ndërsa me kallëzim penal do t'i dërgohet prokurorit kompetent të shtetit pranë Prokurorisë Themelore të Shtetit në Plavë”, thuhet në njoftimin e policisë.

Punonjësit e policisë të Departamentit të Sigurisë Bijello Pole kanë kryer dy kontrolle. Te M.A., pronar i hotelit “K”, është kryer kontrolli i banesës dhe hapësirave të tjera, me ç’rast janë gjetur dhe sekuestruar dy pushkë dhe dy pistoleta në posedim të ligjshëm, si dhe 85 copë municion pushke, 145 copë municion pistoletësh përkatës dhe 17 copë municion pistoletësh që nuk u përkasin pistoletave në posedim të tij të ligjshëm.

“Gjithashtu, janë gjetur një pistoletë gazi e markës “Blow F06” për të cilën nuk posedon dëshmi se është lajmëruar te organ kompetent shtetëror, një pistoletë sinjalizuese, dy fishekë për pistoletë sinjalizuese, një elektroshok, dy shkopinj gome policorë, 10 tableta “Diazepam” për të cilat nuk posedon dokumentacion mjekësor, si dhe para në vlerë të përgjithshme prej 33.100 eurosh. Për ngjarjen është njoftuar prokurori kompetent i shtetit”, theksuan në kumtesë.

Me kontrollin e banesës së D.J. në Bijello Pole u gjetën 5 copë municion të kalibrit 6,35 mm, të cilat i përkasin një pistolete e cila është trashëguar, por nuk është regjistruar ligjërisht, andaj në përputhje me këtë, këtij personi i është lëshuar një urdhërpagesë për gjobë në përputhje me Ligjin për Armët.

“Zyrtarët e Departamentit të Sigurisë Rozhajë kanë kryer tre kontrolle. Gjatë kontrollit të banesës dhe hapësirave të tjera të F.D., është gjetur dhe sekuestruar një pistoletë e markës “Crvena Zastava” M70, e kalibrit 7,65 mm në posedim të paligjshëm. Për ngjarjen është njoftuar prokurori i shtetit në Prokurorinë Themelore të Shtetit në Rozhajë, i cili pas ekspertizës do të deklarohet mbi cilësimin juridik të veprës. Po ashtu, prej tij është sekuestruar përkohësisht një automjet udhëtarësh i markës “Porsche Macan”, me targa të një shteti tjetër, për ndërmarrjen e masave dhe veprimeve të mëtejshme kriminalistike. Gjatë kontrollit të banesës dhe hapësirave të tjera të H.K. nga Rozhaja janë gjetur dhe sekuestruar dy pushkë, përkatësisht një pushkë e markës “Crvena Zastava”, e kalibrit 8×57, dhe një pushkë gjuetie “Bokerica ruse VDSCOK”, si dhe 79 copë municion të markave dhe kalibrave të ndryshëm. E gjithë kjo gjendej në posedim të paligjshëm të H.K. Për ngjarjen është njoftuar prokurori kompetent i shtetit, i cili pas ekspertizës do të deklarohet mbi cilësimin juridik të veprës. Gjatë kontrollit të banesës dhe hapësirave të tjera të A.F. në Rozhajë nuk janë gjetur sende dhe objekte që në përputhje me ligjin mund të sekuestrohen”, thuhet në njoftim.

Zyrtarët e Departamentit të Sigurisë Mojkovc kanë kryer kontrollin e banesës dhe hapësirave të tjera të P.J., me ç’rast është gjetur dhe sekuestruar një armë zjarri me tytë të gjatë – pushkë gjuetie e markës “Zastava” M64, e kalibrit 12 GA, si dhe një rrip lëkure për fishekë (redenik) me 17 copë fishekë të kalibrit 12 GA, për të cilat nuk poseduje dokumentacion të vlefshëm. Për ngjarjen është njoftuar prokurori i shtetit në Prokurorinë Themelore të Shtetit në Bijello Pole, i cili pas ekspertizave të nevojshme do të deklarohet mbi cilësimin juridik të veprës.

Zyrtarët e Departamentit të Sigurisë Kollashin kanë kryer dy kontrolle në banesat që shfrytëzohen nga B.G. dhe B.V., ndërsa zyrtarët e Departamentit të Sigurisë Beranë kanë kryer tre kontrolle në banesat që shfrytëzohen nga personi me interes operacional V.I., si dhe nga personat A.I. dhe B.D. Gjatë kontrolleve nuk janë gjetur sende me rëndësi, respektivisht që në përputhje me ligjin mund të sekuestrohen.

“Zyrtarët e Drejtorisë së Policisë në territorin e të gjithë Malit të Zi do të vazhdojnë me aktivitete të karakterit parandalues dhe represiv, të drejtuara drejt zvogëlimit të disponueshmërisë së armëve në posedim të paligjshëm, si dhe të posedimit të sendeve dhe objekteve të tjera të palejuara, e gjitha kjo me qëllim të uljes së vëllimit të kriminalitetit dhe krijimit të një mjedisi më të sigurt për jetën e qytetarëve”, kanë njoftuar nga Drejtoria e Policisë.